काठमाडौँ, १२ असोज ०७५/नेपाल भलिबल सङ्घ र भारतको आधिअवाधी फाउण्डेसनको आयोजनामा हुने सर्वाधिक पुरस्कार राशिको महिला भलिबल प्रतियोगिता शनिबारदेखि हुने भएको छ ।
भलिबल सङ्घले आज पत्रकार सम्मेलन गरी शनिबार शुरु हुने प्रतियोगिता असोज १७ गतेसम्म सञ्चालन हुने जानकारी दिएको हो ।प्रतियोगिताको उद्घाटन खेल चितवन टाइगर्स र त्रिभुवन आर्मी क्लबबीच हुनेछ । प्रतियोगिताका सबै खेल त्रिपुरेश्वरस्थित राष्ट्रिय खेलकूद परिषद् (राखेप)को कभर्ड हलमा हुनेछन् ।
लिगकम नकाउटका आधारमा सञ्चालन हुने प्रतियोगितामा न्यू डायमण्ड, चितवन टाइगर्स र त्रिभुवन आर्मी सशस्त्र प्रहरीको एपिएफ, नेपाल पुलिस र पोखरा पिङ्केज गरी छ टोलीले सहभागिता जनाएका छन् ।भलिबलको इतिहासमा सर्वाधिक राशि पुरस्कारको प्रतियोगिताको विजेताले रु छ लाख, दोस्रो हुनेले रु तीन लाख र तेस्रो हुनेले रु एक लाख ५० हजार प्राप्त गर्नेछन् ।
प्रतियोगिताको उत्कृष्ट खेलाडीले एक थान स्कुटर र रु ५० हजार प्राप्त गर्ने नेपाल भलिबल सङ्घका महासचिव जीतेन्द्रबहादुर चन्दले जानकारी दिनुभयो ।
