काभ्रे०२साउन०७५/ पोर्चुगलका कप्तान तथा विश्व चर्चित खेलाडी क्रिष्टियानो रोनाल्डोले युभेन्टसमा आउनु पाउँदा आफु खुशी रहेको बताएका छन् । टुरिनमा युभेन्टससँग सम्झौता गरेपछि पत्रकारहरुसँग रोनाल्डोले अर्को चुनौतिको सामना गर्न इटालियन क्लब युभेन्टस आएको बताएका हुन् ।
युभेन्ट्सले सोमबार राति रोनाल्डोलाई पहिलोपटक पत्रकार सम्मेलनबाट सार्वजनिक गरेको हो । रोनाल्डोले पत्रकार सम्मेलनमा भने “यो मेरो करियरको महत्वपूर्ण कदम हो । म एकदमै खुसी छु ।”
३३ वर्षीय रोनाल्डोले रियल मड्रिडमा सर्वाधिक गोल गरेका छन् । रोनाल्डोले रियलमा ४५० गोल गरेका छन् । पाँच पटकको बालोन डी’ओर बिजेता रोनाल्डोले रियललाई चार पटक च्याम्पियन्स लिग जिताउन महत्वपूर्ण भूमिका खेलेका थिए ।
युभेन्टसले रोनाल्डोलाई यसै साता ११२ मिलियन युरोमा आफ्नो क्लबमा भित्र्याएको हो । सन् २००९ मा इंग्लिस क्लब म्यानचेस्टर युनाइटेडबाट स्पेनिस क्लब रियल मड्रिडमा अनुबन्धित भएका रोनाल्डो रियलसँगको सम्झौता अझै ३ बर्ष बाँकी हुँदाहुँदै युभेन्ट्स गएका हुन् ।
