यी कान मेरा कति चर्चराए
यी हातगोडा कति झम्झमाए
जागै बिताएँ कति रातलाई
जलेँ, जलाएँ कति आँतलाई !
न भोकमा स्वाद लिँदै अघाएँ
सखार लम्की कति चक्कराएँ
हतारमा हर्दम ताप बोकी
कुदेँ म घन्टीसित सास रोकी !
घोकेँ “ म राम्रो “ जुन पाठ मैले
राम्रो म ठानूँ कुन पाठ ऐले ?
निशान मेरो मन-ज्ञानचित्र
छ साथमा प्राप्त प्रमाणपत्र !
योद्धा महाभारतको बनेर
खटेर पारेँ रण वारपार
बिर्सिन्न मेरो प्रिय वर्णमाला
घोकी बनाएँ अब कण्ठमाला !!
(छन्द : उपजाति )
( सत्ताका किनाराहरू – कवितासंग्रह -२०७० बाट साभार )
प्रतिक्रिया दिनुहोस्
