काठमाडौं २९ फागुन०७४/ वाम गठबन्धनकी साझा उम्मेदवार विद्यादेवी भण्डारी दोस्रो कार्यकालका लागि राष्ट्रपतिमा निर्वाचित भएकी छिन् ।
मंगलवार सम्पन्न निर्वाचनमा प्रतिष्पर्धी नेपाली कांग्रेसकी कुमारी लक्ष्मी राईलाई पराजीत गर्दै भण्डारी दोस्रो कार्यकालका लागि राष्ट्रपति निर्वाचित भएकी हुन् ।
भण्डारीले ३९ हजार २७५ र रार्इले ११ हजार ७३० मतभार प्राप्त गरेको एमाले स्राेतले जानकारी दिए ।राष्ट्रपति चयनका लागि मंगलवार भएको निर्वाचनमा संघीय संसदका ३ सय २६ र प्रदेश सभाका ५ सय ३६ गरी ८ सय ६२ जनाले मतदान गरेका थिए ।
स्वतन्त्र सांसद डा बाबुराम भट्टराई सहित प्रतिनिधिसभाका ५ र प्रदेश सभाका १३ सांसद मतदानमा अनुपस्थित थिए ।भण्डारीको पक्षमा नेकपा एमाले, माओवादी केन्द्र, संघीय समाजवादी फोरम र राजपाले मतदान गरेका थिए ।भण्डारी यसअघि ११ कात्तिक २०७२ मा पहिलो पटक राष्ट्रपति निर्वाचित भएकी थिइन् ।
