तनहुँ ०४पाैष०७४/ नेपाली कांग्रेसका वरिष्ठ नेता रामचन्द्र पौडेलले निर्वाचनमा पराजित भए पनि घरदैलो कार्यक्रममा व्यस्त रहेका छन्। हारेपनि कति पनि विचलित नभएको पौडेलले बताए।
व्यास नपा–१० को खहरेमा सोमबार आयोजित कार्यक्रममा उहाँले भन्नुभयो, ‘निर्वाचनमा हार जित हुनु स्वाभाविक प्रक्रिया हो, आफू पराजित भए पनि कति पनि विचलित भएको छैन्, जनताको सुख–दुःखमा सधैँ साथ दिइरहनेछु ।’
वरिष्ठ नेता पौडेलले संसद्ले पूर्णता नपाएसम्म प्रधानमन्त्री शेरबहादुर देउवाले राजीनामा गर्ने कुरै आउँदैन भन्दै राष्ट्रिय सभा गठनसम्बन्धी अध्यादेश पारित भएपछि आफूहरु जुनसुकै बेला सरकार छोडिहाल्ने बताउनुभयो ।
मुलुकको लथालिङ्ग अवस्थालाई छोडेर प्रधानमन्त्रीले राजीनामा गर्न नमिल्ने बताउँदै उहाँले सशक्त प्रतिपक्षको भूमिका निर्वाह गर्न कांग्रेस आतुरसमेत रहेको धारणा व्यक्त गर्नुभयो ।
वरिष्ठ नेता पौडेलले स्थानीय तहको निर्वाचन सम्पन्न गरी गाउँ–गाउँमा सिंहदरबार पुर्याएको उल्लेख गर्दै अब जिल्लाकै विकासमा आफू जनप्रतिनिधिसँग हातेमालो गर्दै लागिरहने बताउनुभयो ।
निर्वाचनमा पराजित भए पनि मतदातालाई धन्यवाद दिन नेता पौडेल अहिले उनीहरुको घरदैलोमा पुगिरहेको छ । यसैक्रममा बैरेनी, व्यास–७ को कलेस्ती, व्यासको छापथोक, वडा नं ८ को कोटथोक, व्यास–९ को बेलभञ्ज्याङ, कात्तिकेचौर, दलभञ्ज्याङ, तारुका, गैह्रीसरा, माझथर, पुलिमर्याङलगायतका मतदातासँग भेटी सहयोग पुर्याएको भन्दै नेता पौडेलले उनीहरुलाई धन्यवाद व्यक्त गर्नुभयो ।
