नुवाकोट, १३ कात्तिक०७४/ यही कात्तिक १७ र १८ गते नुवाकोटमा १७ औँ सिनियर र १० औँ जुनियर राष्ट्रिय आइटीएफ तेक्वान्दो प्रतियोगिता हुने भएको छ ।
नेपाल इन्टरनेशनल तेक्वान्दो महासंघ नुवाकोटको आयोजनामा राष्ट्रियस्तरका सिनियर र जुनियर दुवैतर्फको प्रतियोगिता सञ्चालन गर्न लागेको खेल व्यवस्थापन समितिका संयोजक वासुदेव भट्टले जानकारी दिनुभयो ।
प्रतियोगितामा साविकको पाँच विकास क्षेत्र, नेपाल आर्मी क्लब, सशस्त्र प्रहरी र आयोजक नुवाकोट गरी आठ समूहले सहभागिता जनाउने भएका छन् ।
प्रतियोगितमा पुरुषतर्फ २० केजीदेखि ८० केजीसम्मका गरी विभिन्न तौल समूहका १३ जना र महिलातर्फ २१ केजीदेखि ७५ केजीसम्मका १२ जना गरी एक समूहबाट २५ जनाले सहभागिता जनाउने संयोजक भट्टले बताउनुभयो ।
प्रतियोगिता एकल स्पाएरिङ र एकल प्याट्रन गरी दुई विधामा सञ्चालन गर्न लागेको आइटीएफ तेक्वान्दो नुवाकोटका अध्यक्ष हरिकृष्ण श्रेष्ठले जानकारी दिनुभयो ।
प्रतियोगितामा सहभागीले ४१ स्वर्ण, ४१ रजत र ८२ कास्य पदक गरी १६४ पदकका लागि खेलाडीबीच प्रतिस्पर्धा गराउन लागिएको छ । प्रतियोगितामा करिब २०० खेलाडी सहभागी हुने आयोजकले जनाएको छ ।
