कोहलपुर१५ साउन०७४/ पत्नीसँग बिछोड गराएको भन्दै बैजनाथ ३ मसुरीस्थित ससुरालीमा अर्जुन सार्की पाँच दिनदेखि अनशनमा बसेका छन् ।
अन्तरजातीय विवाह गरेकै कारण सासुससुराले आफूविरुद्ध प्रहरीमा घरेलु हिंसा र सम्बन्ध बिच्छेदको मुद्दा दर्ता गराएर उत्नीसँग विछोड गराएको भन्दै उनी पाँच दिनदेखि पानीमात्र पिएर ससुरालीको घरछेउको खेतमा अनशनमा बसेका हुन् ।
उनको स्वास्थ्य अवस्था समेत कमजोर बन्दै गएको छ । सासुससुराले पत्नी दर्लामीलाई लुकाएको र आफूविरुद्ध मुद्दा दर्ता गराएको उनको आरोप छ ।
दैलेख नारायण नगरपालिका ६ घर भएका सार्कीले २०७३ असोजमा अन्तरजातीय विवाह गरेका थिए ।उनी आफूमाथि अन्याय भएको भन्दै ससुरालीमा साउन ८ गतेदेखि भोकभोकै अनशनमा छन् । पत्नीलाई भड्काएर आफूबाट टाढा बनाएको र आफूमाथि झुटो मुद्दा लगाएर फसाउन खोजेको उनको भनाइ छ ।
‘हामी दुई छुट्टिन चाँहदैनौं’, उनले भने, ‘सासुससुराले माइतीघरबाट सँगै दैलेख पठाउने बहानामा बीचबाटोबाट भगाए ।’सार्कीको ससुराली बैजनाथ–३ नौवस्ता मसुरीखेत बाँकेमा रहेको छ । पत्नी रत्नाका लागि आफू भोकभोकै मर्न तयार रहेको उनले बताए ।
सासुससुराले पत्नीलाई आफूसामु नल्याउँदासम्म अनशन जारी रहने र मर्न परे पनि ससुराली घरमै मर्ने उनी बताउँछन् । -नागरिक दैनिकबाट
