दोलखा३१ वैशाख०७४/ स्थानीय तहको निर्वाचनमा अहिले सम्म दोलखा बढी तनावपूर्ण देखिएको छ । काग्रेस र माओवादी केन्द्रको गठबन्धनले बुथ कब्जा गरेको भन्दै एमालेका तामाकोशी गाउपालिकाका अध्यक्षका उम्मेदवार इश्वरचन्द्र पोखरेल लगायतका सबै उम्मेद्वार र बैत्येश्वर गाँउपालिकाका पनि सबै उम्मेद्वारहरु बुथ छोडेर हिडेका छन् ।
इश्वरचन्द्र पोखरेल एमाले दोलखाका जिल्ला अध्यक्ष समेत हुन् । उनले मतदान गर्ने जामुने बुथमा कांग्रेस र माओवादीले आक्रमण गरेको भन्दै आफ्नो पक्षका मतदाताको सुरक्षा गर्न मतदान केन्द्र छाडेर हिँडेको बताए ।
सो वडाका एमाले उम्मेदवार परशुराम कार्की र एमालेका गाउँपालिका संयोजक जिवस खड्का गम्भीर घाइते भएका छन् । कालपानी बुथमा उनीहरुमाथि कांग्रेस र माओवादी कार्यकर्ताले आक्रमण गरेको एमाले नेताले बताए । घाइतेलाई प्रहरीले उपचारका लागि भनेर जामुने बुथमा ल्याएर छाडेको छ ।
जिल्ला प्रहरी कार्यालयले भने सो स्थलमा स्थिति सामान्य बनाएर पुनः मतदान थालिएको जनाएको छ । तर, एमाले नेताले दिएको जानकारी अनुसार जफेका दुवै बुथबाट एमालेका उम्मेदवार र मतदाता भागिसकेका छन् ।
दोलखाको तामाकोशी गाउँपालिकाको शहरेमा पनि हवाई फायर भएको छ ।उता वैत्यश्वर गाउँपालिकाको गैरीमुदीका दुवै बुथमा विहानैदेखि तनाव सिर्जना भएको छ । कांग्रेस र एमालेबीच झडप भएपछि प्रहरीले हवाई फायर गरेको थियो ।
दुवै बुथ कांग्रेस र माओवादीले कब्जा गरेको भन्दै एमालेले निर्वाचन बदर गर्न जिल्ला निर्वाचन कार्यालयमा उजुरी दिएको छ ।आलम्पुमा एमालेले अरु पार्टीका कार्यकर्तामाथि आक्रमण गरेको भन्दै उजुरी परेपछि त्यहाँ भने मतदान रोकिएको छ । गौरीशंकर गाउँपालिकाका ठाउँ-ठाउँमा एमालेले आफ्ना कार्यकर्तामाथि आक्रमण गरेको कांग्रेस र माओवादीले आरोप लगाएका छन् ।
