काठमाडौं १४बैशाख०७४/ राष्ट्रिय प्रजातन्त्र पार्टीले आगामी १० वर्षमा हरेक नगरपालिकालाई ‘स्मार्ट सिटी’ बनाउने महत्वाकांक्षी लक्ष्यसहित घोषणा पत्र सार्वजनिक गरेको छ ।राप्रपा अध्यक्ष कमल थापाले बुधबार ललितपुरको हिमालयन होटलमा आयोजित पत्रकार सम्मेलनमार्फत पार्टीको घोषणा पत्र सार्वजनिक गरेका हुन् ।
स्थानीय तहको निर्वाचनका लागि जारी गरिएको घोषणा पत्रमा राप्रपाले प्रत्येक गाउँपालिकालाई आत्मनिर्भर र व्यवस्थित नगरोन्मुख गाउँका रुपमा विकसित गरिने दाबी गरेको छ ।
कुल बजेटको २० प्रतिशत शिक्षामा
राप्रपाले गाउँ/नगरपालिकाहरुको आफ्नो कूल बजेटको कम्तिमा २० प्रतिशत शिक्षा क्षेत्रमा विनियोजन गरिने बताएको छ । स्थानीय तहबाट अनुदान प्राप्त गर्ने विद्यालयहरुमा माध्यामिक तहसम्मको पढाइ निःशुल्क गर्ने उसले बताएको छ ।
राप्रपाले शिक्षकहरुलाई राजनीतिक दलको सदस्य बन्न रोक लगाउने बताएको छ । साथै स्कुलहरुमा बन्द हड्ताल गर्न र दलको भ्रातृ संगठन खोल्न बन्द गरी शैक्षिक क्षेत्रलाई राजनीतिक हस्तक्षेपमुक्त बनाउने बाचा घोषणापत्रमा गरिएको छ ।
प्रत्येक गाउँ/नगरपालिकाले हरेक वर्ष छात्रवृत्ति प्रदान गरी गाउँ/नगरको जेहेन्दार विद्यार्थी मध्येबाट एकजना डाक्टर र एकजनालाई इञ्जिनियरिङ पढ्न पठाइने बताइएको छ ।
राप्रपाले भनेको छ- ‘त्यसरी पढेर आएको व्यक्तिले कम्तिमा ५ वर्ष सम्बन्धित गाँउ नगरको अस्पतालमा काम गर्नु पर्नेछ ।’
२५ बेडको अस्पताल, आवासका लागि ‘स्वामित्वमा साझेदारी’
राप्रपाले प्रत्येक स्थानीय तहमा कम्तिमा २५ बेडको एक अस्पताल निर्माण गर्ने बताएको छ । गाउँ र नगरपालिकाहरुमा स्वास्थ्य उपचार कोष स्थापन गर्ने र क्यान्सर लागेका एवं मृगौला फेल भएका बिरामीहरुलाई १ लाख औषधोपचार खर्च दिने घोषणा पत्रमा उल्लेख छ ।
प्रत्येक वडामा २ जना महिला स्वास्थ्य स्वयंसेविका नियुक्त गर्ने, ५ बर्षभित्र सबै नगारिकको स्वास्थ्य वीमा गर्ने र विपन्न परिवारमा जन्मिएका शिशुलाई ५ हजार रुपैयाँ सुपोषण अनुदान दिने उसले बताएको छ ।
राप्रपाले व्यवस्थित आवासका लागि ‘स्वामित्वमा साझेदारी’ (सेयर्ड अनरसिप) को अवधारणा अघि सारेको छ । ‘यस प्रणालीमा आवास उपभोक्ताले घरको केही अंश वा तल्ला वा फ्याट घरधनीलाई रकम भुक्तानी गरी खरीद गर्ने र बाँकी रकम घरमा बसेवापत मासिक भाडाका रुपमा भुक्तानी गर्दै जाने प्रणाली राप्रपाबाट विजयी भएका महानगरपालिका, उपमहानगरपालिका र नगरपालिकामा लागु गरिनेछ’ घोषणा पत्रमा भनिएको छ ।
एक परिवार एक रोजगारी, २५ जनालाई रोजगारी दिए स्थानीय कर मिनाहा
राप्रपाले ‘एक परिवार एक रोजगारी’ को नारा दिएको छ । उसले २५ जनाभन्दा बढीलाई रोजगारी प्रदान गर्ने उद्योग तथा व्यवसायलाई १० वर्षसम्म सबै प्रकारका स्थानीय कर मिनाहा गर्ने राप्रपाको प्रतिवद्धता छ ।
प्रत्येक घरमा बिजुली र खानेपानी र ५ बर्षभित्र हरेक वडामा मोटरबाटो पुर्याउने बताएको छ ।
प्रत्येक स्थानीय तहको बिशिष्ठताको आधारमा कृषि क्षेत्र विकास योजना गर्ने र एक गाउँनगर, एक उत्पादन अभियान चलाउने राप्रपाले बताएको छ । व्यवसायिक रुपमा गौपालन गर्नेलाई स्थानीय कर मिनाहा, निशुल्क पशु वीमा र सहुलियतमा ऋण पाउने व्यवस्था गरिने उसले बताएको छ ।
राप्रपाले हरेक स्थानीय तहमा प्लास्टिकका झोला प्रयोगमा रोक लगाउने, एक घर दुई बिरुवा अभियान चलाउने, नगरपालिकाको प्रत्येक वडामा एक बाल उद्यान बनाउने राप्रपाको घोषणा पत्रमा उल्लेख छ ।
राप्रपाले साना जलविद्युत वा सौर्य ऊर्जा उत्पादन गर्न चाहने कम्पनी, गैरसरकारी संस्था वा समुदायलाई लागतको ४० प्रतिशत रकम अनुदान दिने वा स्थानीय तहले शेयर लगानी गर्ने व्यवस्था गर्ने बताएको छ ।
गाउँ/नगरपालिकामा ५ वर्षभित्र एक खेलमैदान वा रंगशाला र कभर्ड निर्माण गर्ने, जनकपुर, लुम्बिनी र विजयपुरलाई क्रमशः मिथिला, बौद्ध र किरात संस्कृतिको वृहत केन्द्रका रुपमा विकास गर्ने पनि उसले बताएको छ ।
कार्यालयमा पृथ्वीनारायणको तस्वीर अनिवार्य
राप्रपाले आफूले जितेको स्थानीय तहका प्रत्येक कार्यालयमा पृथ्वीनारायण शाहको तस्वीर अनिवार्य रुपमा राख्ने व्यवस्था गर्ने बताएको छ । विद्यालयहरुको पाठ्यक्रममा नैतिक र आध्यात्मिक शिक्षाका साथै राष्ट्रियताको भावना अभिवृद्धि हुने विषयहरु समावेश गर्ने उसले बताएको छ । गौहत्यालाई पूर्णत निषेध गर्ने र प्रत्येक गाँउ/नगरपालिकाहरुमा गौशालाहरु निर्माण गर्ने राप्रपाको घोषणा पत्रमा उल्लेख छ ।
