फाल्गुन १६, २०७३- गोरखा नगरपालिका–८ लक्ष्मीबजारस्थित द्रव्यशाह बहुमुखी क्याम्पस परिसरमा सोमबार बिहान करिब साढे ११ बजे बम बिष्फोट भएको छ ।
घटनास्थलको निरीक्षणपछि प्रहरी निरीक्षक महेश्वर उपाध्यायले घटनास्थलमा सुतली भेटिएकाले सुतली बम पड्केको हुन सक्ने बताए ।
बम बिष्फोट भएको भनिएको ठाउँमा बारुद पोखिएको छ भने झारपात जलेका छन् । बिष्फोटको आवाज पछि त्यहा नेपाल प्रहरी र शसस्त्र प्रहरी ठूलो संख्यामा परिचालन गरिएको छ । एक जना युवा आएर बम बिष्फोट गराएको स्थानीयबासीले बताए ।
द्रव्यशाह क्याम्पसमा स्वतन्त्र विद्यार्थी युनियनको चुनावका लागि नेविसंघ, अनेरास्ववियु, अखिल क्रान्तिकारी, नयाँ शक्ति विद्यार्थी युनियनले प्यानल सहित उमेदवारी दर्ता गराएका छन् । बुधबार चुनावको तयारी गरिएको छ । सार्वजनिक बिदा भएपनि क्याम्पस परिसरमा केही प्राध्यापक र विद्यार्थी उमेदवारहरु उपस्थित छन् ।
त्यस्तै गोरखा क्याम्पसमा अखिल क्रान्तिकारी (प्रचण्ड) ले समूहले तालाबन्दी गरेको छ । मनोनयन दर्ताको क्रम नमिलेको भनेर विवाद भएपछि तालाबन्दी गरिएको क्रान्तिकारीले जनाएको छ । नेविसंघ र क्रान्तिकारी एकै समयमा उमेद्वारी दर्ता गर्न पुगेका थिए । निर्वाचन समितिले नेविसंघलाई दुई नम्बरमा दर्ता दिएको थियो ।
दुई नम्बरमा आफु हुनु पर्ने भन्दै क्रान्तिकारीले क्याम्पस प्रशासनमा ताला लगाएको हो । ताला नखुलेसम्म निर्वाचन प्रक्रिया अघि बढाउन नसकिने निर्वाचन समितिका संयोजक यदु अधिकारीले बताए । क्रान्तिकारीले गरेको तालाबन्दी प्रति नेविसंघ, अनेरास्ववियु र नयाँ शक्ति विद्यार्थी युनियनले असन्तुष्टि जनाएका छन् । गोरखा क्याम्पसमा पनि १८ गतेलाई चुनाव तोकिएको छ ।
