काठमाडौं, १६ माघ०७३/ कुलेश्वरमा आईतबार राती भीषण आगलागी भएको छ । कुलेश्वर आवास क्षेत्र भित्र पस्ने गेट नजिक रहेका पसलमा आगलागी भएको हो ।
आगलागीबाट झण्डै १० वटा पसलमा क्षति पुगिसकेको जुद्ध बारुण यन्त्र काठमाडौंका प्रमुख किशोरकुमार भट्टराईले जानकारी दिनुभयो । उहाँका अनुसार कपडा र भाँडा रहेका पसलमा आगलागी भएको हो ।केही पसलमा रसायन समेत भएकाले आगलागी नियन्त्रणमा कठिनाई भएको पनि उहाँले बताउनुभयो ।
कुलेश्वरकाे नबिल बैक नजिक आगलागी भएको पुष्टि गरेता पनि यसको क्षतिको विवरण यकीन भईनसकेको प्रहरीले जनाएको छ ।
अहिले आगोे नियन्त्रणको लागि सुरक्षकर्मीको टोली त्यहाँ पुगिसकेको छ भने काठमाडौं भक्तपुर र ललितपुरबाट आएको दमकलले आगो नियन्त्रणमा लिने प्रयास गरिरहेको छ ।
कालीमाटी प्रहरी वृत्तका डिएसपी नवराज अधिकारीले आगलागी भएको पुष्टि गर्दै आगलागी नियन्त्रणमा नआएसम्म यसको क्षतिको विवरण दिन नसकिने बताए । आगो कहाँबाट सुरु भयो र यसले कति क्षति पुर्यायो भन्ने पनि यकीन भईसकेको छैन ।
