वीरेन्द्र केसी, कास्की,मंसिर ८, २०७३- एमाले सचिव गोकर्ण विष्टले सरकारले संविधान संशोधन गर्न खोजे त्यसको सशक्त प्रतिकार गर्ने चेतावनी दिएका छन् ।
उनले संशोधन प्रस्ताव संसदमा पेश भएमा एमालेले कडा विरोध गरेर प्रस्ताव पारित गर्न नदिने दावी गरे । ‘तराइका जमिन्दार र सीमित नेतालाई खुसी पार्न सरकारले संविधान संशोधनको प्रस्ताव ल्याउँदैछ,’ प्रेस चौतारी अर्घाखाँचीले सन्धिखर्कमा गरेको पत्रकार भेटघाटमा बुधवार विष्टले भने, ‘हामीलाई मान्य हुँदैन । कुनै हालतमा संशोधन हुन दिँदैनौं ।’
अहिलेको आवश्यकता संविधान संशोधन नभएर संविधानको कार्यन्यवन भएकाले संशोधन आवश्यक नरहेको उनको तर्क छ । सरकारले कार्यन्यवन तर्फ ध्यान निदिएको उनको आरोप छ । केही सीमित मधेसी नेतालाई चित्त बुझाएर सत्ता टिकाउने नाममा ५ नम्बर प्रदेशका पहाडी जिल्लालाई तराइबाट अलग गर्न खोज्ने षड्यन्त्र भएको उनले बताए ।
‘कुनै हालतमा पाँच नम्बर प्रदेशलाई टुक्राउन दिँदैनौ,’ उनले भने, ‘टुक्राइए सशक्त प्रतिवाद र आन्दोलन गर्छौं । गुल्मी, अर्घाखाँची र पाल्पा ५ नम्बर प्रदेशबाट अगल हुँदैनन् ।’ उनले संविधान सम्झौताको दस्तावेज भएकाले संशोधन गर्न मिल्ने भएपनि राष्ट्रिय हित विपरितको काम गर्न नदिने दावी गरे ।कान्तीपुर
