काठमाडौं२९,कात्तिक/ नेपालमा हिन्दी भाषालाई संविधानमा सूचीकृत गर्ने कि नगर्ने भनेर विवाद चलिरहेको समयमा भारतीय रिजर्भ बैंकले भने आफ्नो नयाँ नोटमा नेपाली भाषा समेत प्रयोग गरेको छ । एक हजार र ५ सयका भारु नोटमा प्रतिवन्ध लगाएको भारत सरकारले ल्याउन लागेको २ हजारको नयाँ नोटमा नेपाली भाषाको समेत प्रयोग भएको हो ।
उक्त नोटमा लेखिएको भाषा मध्ये “दुई हजार रुपैयाँ” भनेर नेपाली भाषा समेत समावेश छ । भारतमा २ हजार भारुको नयाँ नोटमा प्रयोग भएको देवनागरी शब्दलाई लिएर गल्ती रहेको भन्दै चर्चा भएको हो । भारतमा पनि नेपाली भाषी नागरिकहरु छन् र भारतको संविधानको अनुसूचिमा समेत नेपाली भाषा उल्लेखित छ ।
नेपाली भाषा नेपाल बाहेक भारत, भुटान, बर्मा आदि ठाउँमा नेपाली भाषा बोल्ने गरिन्छ । भारतको पश्चिम बङ्गालअन्तर्गत पर्ने दार्जिलिङ, जलपाइगुडी, बागडुग्रा, डुवर्स आदि विभिन्न क्षेत्रमा नेपालीहरूको बाहुल्य रहेको छ ।
यसका अतिरिक्त आसाम, मेघालय, मणिपुर, नागाल्यान्ड, मिजोरम, सिक्किम, अरुणाचल आदि राज्यमा पनि नेपालीहरूको ठूलो उपस्थिति रहेको छ । उता देहरादुन, भाग्सु, कुमाउ, गढवाल, बनारस, दिल्ली आदि क्षेत्रमा पनि नेपालीहरू स्थायी रूपमा बसोबास गरिरहेका छन्।
