पाँचथर, २४ जेठ । लाखौँ रुपैयाँ ठगेर फरार भएका अभियुक्त पक्राउ गरी सार्वजनिक गरेको छ । जिल्लाको फिदिमसहित नाङ्गिनका गरी १० जनाको नगदसहित सुन गरी १८ लाख ४८ हजार ठगेर फरार भएका तेञ्जीछिरिङ भुटिया पक्राउ परेका हुन् ।
उनलाई प्रहरीले तनहुँको बन्दीपुर नगरपालिका–१ भानु डुम्रे बजारबाट पक्राउ गरेको जिल्ला प्रहरी प्रमुख प्रहरी नायब उपरीक्षक कृष्णप्रसाद कोइरालाले जानकारी दिए । पिछा गर्दै गएको प्रहरीले पोखराबाट काठमाडौँ जाने क्रममा सो ठाउँबाट पक्राउ गरेर नगदसहित गरगहना पनि बरामद गरेको छ ।
सुन १६ तोला, चाँदी तीन तोला, नगद एक लाख ५८ हजार तीन सय ५०, ल्यापटप एक थान, क्यामेरा एक थान बरामद गरिएको हो । तर उनले तीन लाखभन्दा बढी भने करिब पाँच दिनमै खर्चिएको पाइएको जानकारी दिइयो ।
उनले गुम्बा निर्माणमा सहयोग गर्ने जागिर नहुनेलाई लगाइदिने, निःसन्तान भएकालाई सन्तान दिलाइदिने, बिरामी र धनमालको पनि झारफुक गरिदिने भन्दै धनमाल हात पारेका थिए ।
गत सालको वैशाखमा भूकम्प जाँदा सिन्धुपाल्चोक कारागारमा कैद भुक्तान गरिरहेका उनी फरार भएका थिए । केही महिना भारत बसेर फेरि नेपाल आएका उनले उदयपुरको मुर्कुची भन्ने ठाउँका दुई घरबाट गरी रु १५ लाखभन्दा बढी ठगिएको प्रहरीमा उजुरी रहेको डिएसपी कोइरालाले बताउनुभयो । उनीविरुद्ध ठगी मुद्दा चलाइने भएको छ ।
यससँगै उनी नेपाली नागरिक नभए पनि चालक अनुमति पत्र पाइएपछि सरकारी छाप कीर्ते दस्तखतमा थप मुद्दा चलाइने कोइरालाको भनाइ छ ।
