काठमाडौ, जेष्ठ ५ – सूचना तथा सञ्चारमन्त्री शेरधन राईले संघीय गठबन्धनले सुरु गरेको राजधानी केन्द्रीत आन्दोलनको कुनै तुक र औचित्य नभएको दावी गरेका छन ।
नयाँ शक्ति अनलाईन डटकमको बुधवार रिपोर्टर्स क्लब नेपालमा सुरुवात कार्यक्रममा उनले गठबन्धनको आन्दोलन आवश्यकता नभएकोले जनताको सहभागिता नरहेको भन्दै अन्तमा आन्दोलनबाट थाकेर बार्तामा फर्किन बाध्य हुने ठोकुवा गरे । मन्त्री राईले भने, ‘नाकाबन्दी गरेर जनतालाई दुख दिने गरी गरिएको आन्दोलनको तुक नदेखेर उहाँहरुले काठमाडौमा दवाव दिन आएको भन्नु हुन्छ । यस्तो आन्दोलनले दवाव नपर्न पनि सक्छ ।’
उनले सरकारलाई दवाव पुगेर नै संविधान संशोधन, सीमांकन मिलाउन राजनीतिक समिति र बार्ताकोलागि लिखित आब्हान गरेको स्पष्ट पार्दै आन्दोलनले संविधानको जग हल्लाउने र स्वाभिमान र स्वाधिनतामा प्रश्न उठाएकोले त्यसमा सरकार नझुेको दावी गरे ।
संविधानमा कुनै विभेद नभएको दावी गर्दै मन्त्री राईले अब पनि बार्तामा आएर समस्या समाधानमा नलागे सरकारले गठबन्धनको २६ बुँदे माग, संविधानमा त्यस सम्बन्धमा रहेको ब्यवस्था र सरकारले त्यसकोलागि गरेको कामको विवरण राखेर तथ्य सार्वजनिक गर्ने चेतावनी दिए ।
उनले संविधान पुर्नलेखनको कुरा अत्यन्तै खतरनाक भएको भन्दै यो जनताको अपमान भएकोले कुनै पनि हालतमा सम्भव नभएको ठोकुवा गरे । मन्त्री राईले भने, ‘यो कसैको कृपाले जारी भएको संविधान होईन । आन्दोलनकारीहरु संविधान कार्यान्वयन हुन नदिएर मुलुकलाई गृहयुद्ध तर्फ धकेल्ने योजनामा छन । सरकारले यो चाहना कदापी पुरा हुन दिदैन । ’
उनले देश यथास्थितिमा रहने वा पछि फर्कन नसक्ने दावी गर्दै आन्दोलनले भ्रम र अन्यौला सृजना गरेको बताए । मन्त्री राईले सरकार संविधानको कार्यान्वयन, पुनःनिर्माण र स्थायित्व कायम गर्दै आर्थिक विकासको बाटोमा अघि बढी रहेको भन्दै आगामि बजेट पनि जनताको परिवर्तित चाहना अनुसार नै आउने स्पष्ट पारे ।
उनले संविधानको मर्म र भावना अनुसार सञ्चारमाध्यममा अकुंश, नियन्त्रण र हस्तक्षेप नगर्ने गरी जिम्मेवार, मर्यादित, ब्यवसायिक र जिम्मेवार बनाएर मुलुकलाई अघि बढाउने गरी सरकारले तयारी गरिरहेको भन्दै सञ्चारमाध्यमलाई विकास, समृद्धि र सुशासनसँग जोडेर अगाडि लिएर जाने बताए ।
अनलाईनका सल्लाहकार निर्मल भट्टराईले आफूहरुको अनलाईन नयाँ शक्ति अभियानसँग नाम मिले पनि यो त्यससँग सम्बन्धित नभई विशुद्ध जनतालाई सत्य तथ्य सूचना दिने उद्देश्यले सञ्चालनमा ल्याएको स्पष्ट पारे ।खरीबाेट
