माघ २८, काठमाडौँ । नेपाल आयल निगमले शुक्रबारदेखि उपत्यकाका सबै पेट्रोलपम्पबाट इन्धन बितरण गर्ने भएको छ ।
वीरगञ्ज नाका खुलेपछि बिहीबार पहिलोपटक आपूर्ति मन्त्रालयमा सरोकारवालाहरुको बैठक बसेको थियो । बैठकले आपूर्ति सहज भएको निष्कर्ष निकाल्दै शुक्रबारदेखि दैनिक साढे ३ लाख लिटर पेट्रोल र साढे ४ लाख लिटर डिजल बाँड्ने निर्णय गरेको नेपाल आयल निगमका प्रवक्ता मुकुन्द घिमिरेले जानकारी दिए ।
उनका अनुसार मोटरसाइकल र स्कूटरहरुलाई एकपटकमा भने ५ लिटरभन्दा बढी पेट्रोल दिइने छैन । यसैगरी चारपांग्रे गाडीहरुले एकपटकमा १५ लिटरभन्दा बढी पाउने छैनन् ।
घिमेरेका अनुसार यो बितरण प्रणाली उपत्यकाको हकमा कार्यान्वयनमा ल्याइएको छ । उपत्यका बाहिरको हकमा भने स्थानीय प्रशासन कार्यालय र निगमको क्षेत्रीय कार्यालयले इन्धनको आयातको अवस्थालाई हेरेर आवश्यक निर्णय गर्नेछ ।
‘शुक्रबारदेखि उपत्यकाको ८० प्रतिशत पम्पबाट इन्धन बितरण हुन्छ’, घिमिरेले भने,‘इन्धनको आपूर्ति बढ्दै गएपछि बाँकी २० प्रतिशतको हाराहारीमा रहेका अन्य पम्पलाई पनि इन्धन उपलब्ध गराउने योजना तयार पारेका छौं ।’
