काठमाडौं, १४ माघ / सत्तारुढ दल एकीकृत नेकपा माओवादीले सरकारको काम कारबाही सन्तोषजनक नभएको निष्कर्ष निकालेको छ ।
पार्टीकातर्फबाट सरकारमा सहभागी मन्त्रीहरुसहित बिहीबार बसेको एमाओवादी स्थायी समिति बैठकले यस्तो निष्कर्ष निकाल्दै जनअपेक्षाअनुसार काम गर्न आफ्ना मन्त्रीहरुलाई निर्देशन दिएको छ ।
साथै एमाओवादी अध्यक्ष प्रचण्डले यसबारे प्रधानमन्त्री केपीशर्मा ओलीसँग कुराकानी गर्ने भएका छन् ।
बैठकपछि एमाओवादी उपाध्यक्ष नारायणकाजी श्रेष्ठले सरकारको काम प्रभावकारी नभएकाले यसलाई प्रभावकारी र परिणाममुखी बनाउनेसन्दर्भमा पार्टी अध्यक्ष प्रचण्डले प्रधानमन्त्रीसँग गम्भीर छलफल गर्ने निर्णय भएको जानकारी दिए ।
बैठकले आफ्ना मन्त्रीहरुले जनअपेक्षा अनुसार काम गर्न निर्देशन दिएको पनि श्रेष्ठले जानकारी दिए ।
यसैबीच सरकार सञ्चालन सहयोग तथा समन्वय समितिको संयोजकबाट उपाध्यक्ष श्रेष्ठले दिएको राजीनामा फिर्ता लिएका छन् । उनले यसअघि नै अध्यक्ष प्रचण्डलाई राजीनामा बुझाएपनि स्वीकृत भएको थिएन ।
स्थायी समितिको अनुरोधलाई स्वीकार्दै आफूले राजीनामा फिर्ता लिएको र समितिको कामकारबाही जारी रहने श्रेष्ठले जानकारी दिए ।
