रुपन्देही, पुस २० । रुपन्देहीको सीमा नाका बेलहियास्थित इन्धन लुकाइएको एक घरमा आइतबार राति आगलागी भएको छ । पानी तताउने क्रममा ग्याँस लिक भएर बेलहियाको सुरेन्द्र जयसवालको घरमा आगलागी भएको प्रहरी निरीक्षक अभयविक्रम शाहले जानकारी दिए ।
आगलागी भएको घरमा कालोबजारीका लागि लुकाइएको पेट्रोलियम पदार्थ र खाना पकाउने ग्याँस भण्डार गरिएकाले आगो नियन्त्रणमा लिन गाह्रो परेको थियो ।
घरको कोठाभित्र लुकाइएको पेट्रोलियम पदार्थ र खाना पकाउने ग्याँस प्रहरीले भित्ता फोडेर निकालेको थियो । आगोले घरका सबै सामग्री जलेको छ । मानवीय क्षति हुनबाट भने जोगिएको प्रहरीले जनाएको छ ।
केही दिन यता बेलहियामा अगाजनीका घटना बढ्दै गएको छ । राष्ट्रिय मानव अधिकार आयोगले समेत रुपन्देहीको बेलहिया नाका भीषण विष्फोटको जोखिममा रहेको प्रतिवेदन सार्वजनिक गरिसकेको छ । आयोगको प्रतिवेदनमा बेलहियाको प्रत्येक घरमा एक सयदेखि दश हजार लिटरसम्म इन्धन भण्डारण गरेको उल्लेख छ ।
– इमेजखबरबाट
