तपाइँ हाम्रो भान्समा प्रयोग हुने लसुनको सेवनबाट हुने विभिन्न फाइदाहरू हुन्छन भन्ने कुरा त बिभिन्न समयमा हुने गरेका अनुसन्धानले देखाउँदै आएका छन । हाले मात्र गरिएको एक नयाँ अनुसन्धान अनुसार यसमा पाइने एउटा तत्वले हामीले खाने भोजनलाई विषाक्त बनाउने ब्याक्टेरियासँग लड्नका लागी प्रभावकारी साबित हुने देखिएको छ ।
उक्त अनुसन्धानमा जनाइए अनुसार, हामीले खाने खानामा लसुनको प्रयोग गर्न सकेमा त्यसले एन्टिबायोटिक भन्दा पनि धेरै हामीलाइ लाभ पुर्याउने देखिएको छ । वासिङ्टन विश्वविद्यालयका अनुसन्धाकर्ताहरूको एक समूहले गरेको अध्ययनबाट लसुनमा पाइने डाइलिल सल्फाइड तत्व विषाणुद्वारा बनाइने बिषालु पत्रलाई तोड्न सफल हुने देखिएको छ । यति मात्र हैन यस तत्वले हाम्रो शरिरमा औषधिले भन्दा पनि राम्रो काम गर्ने गर्दछ, साथै यसले हाम्रो शरिरमा कम समयमानै प्रभाव समेत पार्न सक्दछ ।
उक्त अनुसन्धानमा देखिए अनुसार लसुनले भोजन र मासुलाई विषाक्त हुनबाट समेत जोगाउन सघाउँदछ । लसुनमा पाइने तत्वले भोजन र पर्यावरणमा समेत एउटा विषाणुको खतरालाई कम गर्न सकिन्छ । यो अनुसन्धान जर्नल अफ एन्टिमाइक्रोबियल किमोथेरापीमा प्रकाशित छ ।
